Nota gervitunglamyndir við að greina útbreiðslu lúpínu

Notkun gervitunglamynda við að meta útbreiðslu lúpínu á Íslandi lofar góðu. Nú hefur verið þróuð aðferðafræði við greiningu myndanna og niðurstöður liggja fyrir úr fyrsta hluta samstarfsverkefnis stofnana og háskóla. Frekari rannsóknir eru fyrirhugaðar í sumar.

Þetta er meðal þess sem kom fram á málþingi um alaskalúpínu sem haldið var í höfuðstöðvum Landgræðslunnar í Gunnarsholti á þriðjudag.

Arna Björk Þorsteinsdóttir, landfræðingur hjá Landgræðslunni, kynnti þar niðurstöður sínar, en vettvangsmælingar voru notaðar til að kortleggja útbreiðslu lúpínu á gervitunglamynd innan 45 ferkílómetra rannsóknarsvæðis í nágrenni Reykjavíkur. Kom í ljós að greiningarnákvæmni gervitunglamyndanna var 94 prósent og því ljóst að hér er fundin greiningartækni sem er mjög árangursrík við að fá alltæmandi upplýsingar um útbreiðslu lúpínunnar hér á landi.

Arna Björk segir að í sumar verði fjögur svæði til viðbótar kortlögð með sama hætti og í rannsókn hennar; þar á meðal svæði á sunnanverðum Vestfjörðum, á Hólasandi og í nágrenni Gunnarsholts. Hugmyndir eru jafnframt um að skoða svæði ofan 400 metra hæðarlínu, en ofan hennar má ekki nota lúpínu samkvæmt gildandi lögum. Þessar rannsóknir munu síðan nýtast við að fullgera aðferðir til að móta heildarmynd af útbreiðslu lúpínunnar hér á landi.

Arna Björk segir möguleikana sem opnast með fjarkönnun margvíslega: „Myndagrunnur af SPOT 5 gervitunglamyndum fyrir allt landið er til staðar, og elstu myndirnar eru frá 2002. Myndirnar eru því ekki aðeins mikilvægar til að meta stöðuna í dag, heldur ekki síður til að sjá hvernig lúpínan hefur breiðst út á vissu árabili. Þess vegna er aðferðafræði rannsóknanna miðuð við að auðvelt sé að endurtaka þær til að greina þróunina á milli ára og lengri tímabila.“

Fjarkönnun hefur áður verð nýtt við veðurrannsóknir, hafísmælingar, einnig til að kortleggja gróðurlendi Íslands. Eins hefur hún verið nýtt til jarðfræðirannsókna, til dæmis við að kortleggja umfang hrauna og afleiðingar jökulhlaupa. Á Skeiðarársandi var gerð greining, sem var áþekk lúpínurannsókninni, en þá voru fleiri tegundir gróðurs til skoðunar.

svavar@frettabladid.is