Aukning á slysum og tjónum vegna rafvespa

Tryggingafélagið Sjóvá finnur fyrir aukningu á slysum og tjónum vegna notkunar rafvespa hér á landi. Ástæðan er fyrst og fremst mikil aukning á rafvespum í umferð hér á landi. Helstu notendur rafvespa eru unglingar sem ekki hafa fengið kennslu til þess að stjórna vélknúnum ökutækjum í umferðinni.

Þá segir í tilkynningu í Sjóvá að svo virðist sem allt of margir líti á faratækinn sem leiktæki og því allt of algengt að ekki sé farið eftir umferðarreglum og ökumenn séu ekki með hjálma.

Vespurnar komast ekki mjög hratt, en þær eru hannaðar fyrir allt að 25 kílómetra hraða. Aftur á móti geta þær verið 60 kíló á þyngd.

„Það er full ástæða til þess að vekja athygli á aukningu slysa vegna rafvespa sérstaklega þar sem það eru ekki eingöngu ökumaðurinn sem er í hættu heldur einnig farþeginn og aðrir vegfarendur. Rafvespurnar eru nánast hljóðlausar og því erfitt að verða var við þegar þær á 25 km hraða nálgast. Þegar við þyngd rafvespunnar bætist þyngd ökumanns og jafnvel farþega þá er höggþungi við árekstur orðin mikil sem eykur enn frekar hættuna á alvarlegum slysum." segir Fjóla Guðjónsdóttir forstöðumaður forvarna hjá Sjóvá.

Sjóvá vill einnig árétta að rafvespur eru ekki skráningarskyldar og þar af leiðandi ekki vátryggingaskyldar. Ef réttu tryggingarnar eru ekki fyrir hendi getur notkun rafvespu valdið eiganda og/eða ökumanni verulegu fjárhagslegu tjóni.

Dæmi um það er ef rafvespan skemmist, ef ökumaður, farþegi eða vegfarandi verður fyrir líkamstjóni af völdum tækisins.

Þá þekkir Sjóvá dæmi þess að rekja megi annað eignatjón til notkunar slíkra farartækja. Sjóvá hvetur því eigendur og ekki síst foreldra yngri notenda til að fara vel yfir öryggismál jafnt sem tryggingar áður en notkun er leyfð.