Færeyingar hagnast á olíuleit á Drekasvæðinu

Færeyingar leggja til tvö fylgdarskip í rannsóknarleiðangur sem nú er að hefjast vegna olíuleitar á Jan Mayen-hryggnum og sjá fram á að eyjarnar geti orðið áhugaverðar sem þjónustumiðstöð fyrir olíuleit á íslenska Drekasvæðinu.

Í frétt á færeyska vefnum oljan.fo kemur fram að leiðangur rannsóknarskipsins Nordic Explorer nýtir Færeyjar sem þjónustuhöfn vegna hljóðbylgjumælinga á Jan Mayen-hryggnum næstu þrjá mánuði. Birt er mynd sem tekin var af Nordic Explorer í Þórshöfn í gær.

Í frétt á Stöð 2 í síðustu viku kom fram að eitt íslenskt skip, Valberg VE, verður í hópi þriggja fylgdarskipa Nordic Explorer og sagði útgerðarmaðurinn, Garðar Valberg Sveinsson, að Akureyri yrði nýtt sem þjónustumiðstöð leiðangursins. Sagði Garðar að milljarðatækifæri biðu Íslendinga á þessu sviði.

Íslendingar komast hins vegar ekki með tærnar þar sem Færeyingar hafa hælana í þessum geira því hin tvö fylgdarskipin í leiðangrinum eru færeysk, Thor Asister og Thor Guardian. Þau eru bæði frá Thor-útgerðarfélaginu í Hósvík í Færeyjum. Það félag, sem stofnað var árið 1994, gerir út flota 22 skipa, þar af 6 til fiskveiða en 14 skip til að þjónusta olíuiðnaðinn.

Olíustofnun Noregs kostar hljóðbylgjumælingarnar í sumar, sem gerðar eru í samvinnu við Orkustofnun, en þær fara fram bæði í lögsögu Noregs og Íslands á Jan Mayen-hryggnum. Talsverð umsvif í landi fylgja þjónustu við slíkan leiðangur, ekki síst vegna áhafnaskipta, en um 70 manns verða á skipunum.