Jómfrúarflug WOW Air til Parísar - seinkaði um 45 mínútur

Fyrsta flug íslenska lággjaldaflugfélagsins WOW Air fór í loftið nú rétt fyrir hádegi. Stjórnarformaður segir við hæfi að hefja leik með því að fljúga til borgar draumanna. Fyrsta flugið virðist þó hafa seinkað lítillega, en samkvæmt upplýsingum á vef Keflavíkurflugvallar fór flugvélin á loft 45 mínútum eftir áætlaða brottför.

Það má búast við að komum erlendra ferðamanna til landsins og ferðalögum Íslendinga út fyrir landsteina eigi eftir að fjölga frá deginum í dag þar sem WOW air hefur bæst í hóp þeirra lággjaldaflugfélaga sem halda uppi tíðu áætlunarflugi til og frá Íslandi. Jómfrúarflugið var farið nú klukkan ellefu og Skúli Mogensen, stjórnarformaður er að sjálfsögðu um borð.

„Vélin er nánast full að ég held," segir Skúli Mogensen og bætir við: „Það er allavega fullt af fólki hérna og ég á ekki von á öðru."

Fyrir rúmri viku hafði KFS, félagið sem á að þjónustu Wow Air í Leifsstöð ekki uppfyllt tilskilin leyfi fyrir innritun farþega en málið leystist þó fyrir stóra daginn.

„Það er náttúrulega búin að vera botnlaus vinna núna í 9 mánuði og það hefur haldið áfram fram á síðustu stundu eins og von er með svona stórt verkefni. En það er allt klappað og klárt."

Flugfélagið flýgur til þrettán áfangastaða og byrjar að krafti. „Það er misjafnt eftir vikum hversu mörg flugin eru. Þetta eru svona ca. 25 flug á viku," segir Skúli,

„Og þið farið til Parísar, það er ekki amalegt fyrsta flugið?"

„Nei, það er kannski viðeigandi að þetta er nú borg draumanna að mörgu leyti þannig að ég hlakka til að njóta hennar," segir Skúli að lokum.