Nýr vegarslóði að Flóaáveitu

Áttatíu og fimm ár eru liðin frá því að Flóaáveitan bætti grassprettu til muna og gerði efnalitla bændur í Flóahreppi ríka. Í tilefni tímamótanna hefur verið ákveðið að opna vegslóða að þessu þekkta mannvirki sem er eitt af tveimur í heiminum sem sagt er að sjáist frá tunglinu.

Það er í raun ótrúlegt að mönnum hafi tekist að byggja áveituna árið 1927 þegar vélvæðing var nánast engin. Þessi rúmlega sex kílómetra langi skurður hjá flóðgáttinni við Hvítá var grafinn með fyrstu vélgröfu Íslands en skurðakerfið sjálft er 300 kílómetrar.

„Og það grófu menn bara með skóflum, með handafli," segir Þór Vigfússon, fyrrverandi skólameistari.

Flóðvarnargarðar voru rúmlega 800 km, brýr yfir skurði um 200 og stíflur og flóðgáttir álíka margar.

„Áður fyrr þurftu menn að treysta á guð og forsjónina um hvort það myndi rigna eða verða þurrt," segir Þór

Og uppskera af heyi margfaldaðist og þannig fjölgaði kúm og framleiðslan jókst og menn sem höfðu verið fátækir urðu ríkir.

Áveitan vakti heimsathygli og Neil Armstron tunglfari hafði orð á því á sínum tíma að tvö mannvirki sæust frá tunglinu, Kínamúrinn og sjálf áveitan. Þá fékk Guðbrandur nokkur að kynnast heimsfrægð hennar þegar hann fékk áheyrn hjá Píusi páfa ellefta.

Páfinn vildi ekkert tala um sálarheill mannsins, hann vildi bara tala um Flóaáveituna, Hann var þá búinn að kynna sér allt saman.

Þór segir það hafa reynst áhugasömum erfitt að komast að flóðgáttinni en í kvöld verður breyting á því þá verður vegslóði að henni opnaður. Þór segist sannfærður um að áveitan og hinn nýi slóði muni trekkja að ferðamenn.

Og að lokum hefur Þór þetta að segja um framtíðina.

„Tilbúni áburðurinn er orðinn skratti dýr þannig að það getur vel verið að menn fari að nota þetta meira aftur. Ég spái ekki um það."