Myndi kosta hundruð milljarða

Tíu prósenta niðurfærsla allra húsnæðislána myndi kosta 124 milljarða króna og 25 prósenta niðurfærsla kostaði 310 milljarða. Stærstur hluti kostnaðarins myndi falla á Íbúðalánasjóð, eða 67 til 167 milljarðar eftir atvikum. Þá myndu innlánsstofnanir bera 40 til 99 milljarða kostnað og lífeyrissjóðirnir 18 til 44 milljarða.

Þetta kemur fram í skýrslu um áhrif lækkunar höfuðstóls húsnæðislána, sem fjármálaráðuneytið lét vinna eftir að Guðlaugur Þór Þórðarson og fleiri Alþingismenn óskuðu eftir skýrslu frá fjármálaráðherra um málið. Sveinn Agnarsson og Sigurður Jóhannesson hjá Hagfræðistofnun HÍ og Benedikt Jóhannesson tryggingastærðfræðingur unnu skýrsluna.

Lækkun höfuðstóls húsnæðislána um tíu til 25 prósent hefði veruleg áhrif á hagkerfið í heild. Umtalsverðum hluta af húsnæðisskuldum landsmanna yrði létt af húseigendum á kostnað eigenda fjármálastofnana, sem eru fyrst og fremst hið opinbera, eigendur lífeyrisréttinda og eigendur bankanna. Ríki og sveitarfélög myndu bera að minnsta kosti 70 prósent af kostnaðinum og einungis yrði því um tilfærslu á verðmætum að ræða.

Kostnaður hins opinbera af lækkun höfuðstóls húsnæðislána yrði á bilinu ellefu til 41 prósent af útgjöldum ársins 2011.- þeb