Semja við Alþjóðabankann um jarðhitavæðingu í Afríku

Íslensk stjórnvöld hafa náð samkomulagi við Alþjóðabankann um samstarf á sviði jarðhitaverkefna í Afríku. Össur Skarphéðinsson utanríkisráðherra segir samkomulagið geta orðið vísi að afar mikilvægu framlagi Íslands til þróunarstarfs.

Samkomulagið sem utanríkisráðuneytið hefur gert við Alþjóðabankann byggir á því að hraða jarðhitavæðingu í Austur Afríku sigdalnum svokallaða, en þar liggja þrettán ríki, þar á meðal Djíbútí, Eþíópía og Kenýa, sem öll glíma við veika innviði, meðal annars vegna orkuskorts.

Áætlað er að jarðhitaauðlindir á svæðinu geti gefið af sér 14 þúsund megavött af raforku, sem gæti dugað fyrir orkunotkun allt að 150 milljóna manna sem búa á þessu svæði. Össur Skarphéðinsson, utanríkisráðherra, segir samkomulagið sögulegt.

Íslensk sérfræðiþekking, meðal annars á sviði verkfræði, jarðfræði og tæknigreina af ýmsu tagi, verður uppistaðan í þessari vinnu, en heildarumfang þessara verkefna, til framtíðar litið, er metið í tugum milljarða króna til framtíðar litið.