Stjórnarformaður Orkuveitunnar vill kanna Ölfussamning betur

Fyrrverandi stjórnarformaður Orkuveitu Reykjavíkur og forstjóri fyrirtækisins kunna að hafa farið út fyrir umboð sitt þegar þeir gerðu samninga um peningagreiðslur til Ölfuss vegna Hellisheiðarvirkjunar. Málið þarfnast frekari skoðunar að mati núverandi stjórnarformanns.

Árið 2006 gerði Orkuveita Reykjavíkur samning við sveitarfélagið Ölfus vegna virkjana á Hellisheiði. Hann fól meðal annars í sér rúmlega 52 milljón króna greiðslu Orkuveitunnar til þáverandi bæjarstjórnar og bæjarstjóra Ölfus vegna aukinna umsvifa og álags.

Úttektarnefnd um Orkuveituna sem kynnti niðurstöður sínar telur að þessir samningar um greiðslur vegna óskilgreindra verkefna þarfnist frekari skoðunar.

Þá fékk sveitarfélagið 75 milljónir greiddar vegna uppgræðslustarfa vegna rasks. Þessar 75 milljónir eru í Uppgræðslusjóði Ölfuss en síðar var ákveðið að vextir af þeim fjármunum yrðu nýttir til fjölbreyttra uppgræðsluverkefna en ekki aðeins vegna rasks við virkjunina. Einnig stóð til að Orkuveita Reykjavíkur myndi greiða ýmsan kostnað í Ölfusi svo sem veglýsingu og lagningu ljósleiðara inn á heimili í sveitarfélaginu. En Orkuveitan hefur ekki staðið við þann hluta samningsins.

Reyndar mun sveitarfélagið hafa leitað óformlega eftir því að Orkuveitan stæði við allan samninginn en Haraldur Flosi Tryggvason, núverandi stjórnarformaður mun hafa svarað því þannig til að partíið væri búið, samningurinn yrði ekki fullefndur.

Er þetta rétt eftir þér haft?

„Ég man nú ekki nákvæmlega orðalagið, kannski var þetta svona, en efnislega þá er það rétt að ég hef lýst þeirri afstöðu minni að þessi samningur verði ekki efndur að fullu að óathuguðu máli að minnsta kosti. Hugsanlega eiga þeir lögformlegan rétt á því að þetta verði gert," segir Haraldur Flosi.

En er hugsanlegt að fyrrverandi stjórnarformaður Orkuveitunnar og forstjóri hafi farið út fyrir umboð sitt með þessum samning?

„Það gæti verið, það þarfnast ferkari skoðunar," segir Haraldur. Spurður hvort þetta gæti verið ólögmætur samningur svarar Haraldur: „Það gæti verið flókin staða sem skapast við það já."

Hann segir að ef samningurinn reynist löglegur þurfi Orkuveitan að efna hann.