Iceland Express í samstarf við Hinsegin daga

Iceland Express og Hinsegin dagar í Reykjavík – Gay Pride undirrituðu í dag samstarfssamning sem felur í sér stuðning Iceland Express við Hinsegin daga fyrir hátíð þeirra í ár. Þetta kemur fram í tilkynningu frá félaginu.

Þar segir einnig að félagið muni sjá um að flytja erlenda listamenn, sem koma fram á hátíðinni, til Íslands og styðja forráðafólk Hinsegin daga til vinnuferða í útlöndum. Með samningnum verður Iceland Express einn helsti stuðningsaðili Hinsegin daga.

Hinsegin dagar í Reykjavík eru einn stærsti og mikilvægasti viðburður í landinu ár hvert og dregur til sín hátt í hundrað þúsund gesti. Hátíðin er vel þekkt í útlöndum og ætla má að hundruð ef ekki þúsundir ferðamanna sæki hátíðna ár hvert. Iceland Express mun taka þátt í því með Hinsegin dögum að kynna hátíðina enn frekar í öðrum löndum.

Erlendar rannsóknir sýna að samkynhneigðir, tvíkynhneigðir og transgender fólk ferðast mikið og sækir sérstaklega til landa eins og Íslands þar sem réttindi samkynhneigðra eru virt og þar sem boðið er upp á afþreyingu sem höfðar sérstaklega til þeirra. Engin ástæða er til að ætla annað en að hlutfall samkynhneigðra í hópi ferðamanna til Íslands sé svipað og jafnvel hærra en hlutfall þeirra er almennt í samfélaginu. Það er þvi ekki ólíklegt að 30 til 50 þúsund samkynhneigðir, tvíkynhneigðir eða transgender ferðamenn komi til Íslands á ári hverju.

Iceland Express vill þjóna þessum farþegum eins vel og öðrum farþegum til landsins og til að staðfesta það, gekk félagið í International Lesbian and Gay Travel Association (ILGTA) á síðasta ári. En það eru alþjóðleg ferðamálasamtök fyrirtækja sem bjóða samkynhneigðum þjónustu sína. Félagið mun í samstarfi við Express ferðir bjóða upp á pakkaferðir á Gay Pride hátíðir í öðrum löndum sem og pakkaferðir á Hinsegin daga í Reykjavík í byrjun ágúst, í samstarfi við Hinsegin daga.