Úrhelli truflar æfingar í Belgíu

Rigning og rok settu strik í reikninginn á æfingum dagsins fyrir belgíska kappaksturinn. Enginn ók raunverulega tímatökuhringi á síðustu æfingunni þrátt fyrir að hafa sett opinbera hringtíma.

Kamui Kobayashi á Sauber var fljótastur um Spa-brautina á æfingunni í morgun en meira var ekið á þeirri æfingu. Hringtímarnir eru þó ómarktækir því rigningin var svo mikil og ekki víst að ökumennirnir hafi raunverulega verið að reyna að aka hratt.

Ekki er búist við rigningu á morgun þegar tímatakan fer fram. Það sama er uppi á teningnum á sunnudag þegar keppnin fer fram. Það er þó óráð að reiða sig um of á veðurspár í Adennafjöllum í Belgíu því eins og hér á Klakanum getur sólskin breyst í skúr á augabragði.

Það er því von á spennandi tímatökum á morgun og keppnin á sunnudag verður alls ekki síðri.