Segir fjármálaráðuneytið hafa rænt Lífeyrissjóðnum

Gunnar I. Birgisson, fyrrverandi bæjarstjóri og bæjarfulltrúi í Kópavogi, segir að fjármálaráðuneytið hafi rænt Lífeyrissjóði Kópavogsbæjar. Þetta sagði hann þegar hann gaf skýrslu fyrir Héraðsdómi Reykjaness í máli gegn stjórn Lífeyrissjóðs Kópavogsbæjar og framkvæmdastjóra sjóðsins.

Aðallega er deilt um formið á lánveitingum Lífeyrissjóðsins til bæjarins í lok árs 2008 og í byrjun árs 2009 en lánin numu allt að 600 milljónum króna. Gunnar sagði að ekki hafi komið til umræðu um formið á lánveitingunum fyrr en fjármálaráðuneytið hafi rænt sjóðnum. Þar á Gunnar við að í júní 2009 skipaði fjármálaráðherra, að tillögu Fjármálaeftirlitsins, Lífeyrissjóði starfsmanna Kópavogsbæjar umsjónaraðila.

Gunnar Birgisson hefur núna lokið við að gefa skýrslu, en á undan honum gaf Sigrún Ásta Bragadóttir, fyrrverandi framkvæmdastjóri sjóðsins, skýrslu.



Skeytasendingar milli saksóknara og verjanda

Það gengu skeytasendingar á milli Gests Jónssonar hæstaréttarlögmanns og Einars Tryggvasonar saksóknara við upphaf aðalmeðferðarinnarinar í dag

Gestur Jónsson, verjandi Jóns Júlíussonar, gerði athugasemdir við spurningar Einars í skýrslutökum yfir Sigrúnu Ágústu. Gestur sagði að spurningarnar tengdust ekki ákæruefninu, en það væri fyrst og fremst tekist á um form lánsins.

„Er málflutningur núna?" spurði Einar þá og var augljóslega ekki sáttur.

Hin ákærðu í málinu eru Gunnar I. Birgisson, fyrrverandi bæjarstjóri í Kópavogi, Ómar Stefánsson, bæjarfulltrúi Framsóknarflokks, Flosi Eiríksson, fyrrverandi bæjarfulltrúi Samfylkingar, Jón Júlíusson og Sigrún Guðmundsdóttir og Sigrún Ágústa.