Birgir Leifur verður með á Áskorendamóti í Horsens

Birgir Leifur Hafþórsson, atvinnukylfingur úr GKG, verður á meðal keppenda á Áskorendamótaröðinni í golfi sem að þessu sinni fer fram í Horsens í Danmörku. Áskorendamótaröðin er næst sterkasta atvinnumótaröð í Evrópu á eftir Evrópumótaröðinni. Birgir Leifur var á biðlista fyrir mótið en komst inn í keppnishópinn í gær. Kylfingur.is greinir frá.

Einn þekktasti kylfingur Dana, Thomas Björn, er gestgjafi mótsins. Birgir Leifur hefur tekið þátt á tveimur mótum á Áskorendamótaröðinni á þessu tímabili. Hann er sem stendurí 225. sæti peningalistans en hann endaði í 26. sæti á fyrsta mótinu sem fram fór í Frakklandi um miðjan maí. Þar lék hann samtals á 9 höggum yfir pari vallar (73-69-72-75). Birgir komst ekki í gegnum niðurskurðinn á móti sem fram fór í Austurríki í byrjun júní.

Birgir ætlar sér að taka þátt á úrtökumótunum fyrir PGA mótaröðina í Bandaríkjunum í haust og einnig Evrópumótaröðina þar sem hann var með keppnisrétt árið 2007.

Birgir verður því ekki með á Eimskipsmótaröðinni í golfi sem hefst á föstudaginn þar sem að Securitas-mótið hefst. Þar verða leiknar 54 holur á þremur keppnisdögum en um er að ræða fjórða stigamót tímabilsins.