Reiknar útgerðinni 70% af 75 milljarða hagnaði 2011

Sjávarútvegsfyrirtæki halda eftir 53,5 milljörðum af hagnaði ársins 2011 samkvæmt útreikningum ráðuneytisins. Ríkið fær tæp 30% eða 21,5 milljarða. Gengur þvert á útreikninga banka og endurskoðunarfyrirtækis.

Útreikningar sjávarútvegs- og landbúnaðarráðuneytisins á áhrifum frumvarps um veiðigjald fyrir árið 2011, sýna að útgerðin í landinu myndi halda eftir rúmlega 53 milljörðum króna í hagnað fyrir skatta og eftir greiðslur veiðigjalds til ríkisins. Veiðigjald útgerðarinnar til ríkisins myndi nema 21,5 milljörðum króna. Skipting hagnaðar er því 70/30 útgerðinni í vil.

Þessi niðurstaða byggir á spá sérfræðinga ráðuneytisins fyrir afkomu sjávarútvegsins fyrir árið 2011 og kemur fram í minnisblaði til atvinnuveganefndar Alþingis. Spáin um afkomu greinarinnar, samkvæmt heimildum Fréttablaðsins, er talin frekar nærfærin.

Þessi niðurstaða gengur þvert á útreikninga endurskoðunarfyrirtækisins Deloitte, Íslandsbanka og Landsbankans um gjaldtökuna og áhrif hennar.

Eins og komið hefur fram er niðurstaða Deloitte að ríkissjóður hefði tekið til sín 105% af hagnaði sjávarútvegsfyrirtækjanna á árunum 2001-2010.

Landsbankinn birti nýlega sína útreikninga þar sem koma fram miklar áhyggjur af þeim afleiðingum sem samþykkt frumvarpanna tveggja hefðu fyrir íslenskan sjávarútveg og samfélag. Gert er til dæmis ráð fyrir fjöldagjaldþrotum minni fyrirtækja. Íslandsbanki hafði fyrr birt kolsvarta spá um afleiðingar gjaldtökunnar.

Tilefni greiningar ráðuneytisins er ekki síst sú að svara gagnrýni sem fyrirtækin hafa sett fram á síðustu vikum. Ráðuneytið telur jafnframt að margir greiningaraðilar reikni til skuldir vegna hluta sem eru óskyldir rekstri útgerðanna, til að mynda vegna hlutabréfakaupa og annarra slíkra skulda. Því greini bankarnir ekki ástæður skuldsetningar og við þetta gerir ráðuneytið athugasemdir.

Heimildir Fréttablaðsins greina frá að sérfræðingar ráðuneytisins telji sig hafa sýnt fram á að greinin haldi síst minna eftir af hagnaði sínum en á undanförnum árum. Því er ljóst að himinn og haf skilur á milli í útreikningum, allt eftir því hver heldur á reiknistokknum.svavar@frettabladid.is