"Eins og Steingrímur haldi að hann sé hafinn yfir lög“

Guðlaugur Þór Þórðarson, þingmaður Sjálfstæðisflokks, segir að fjármálaráðuneytið, undir stjórn Steingríms J. Sigfússonar, hafi leppað hlut kröfuhafa SpKef. Guðlaugur gagnrýnir að aðkoma Steingríms að bankanum hafi ekki verið formlega rannsökuð.

Yfirtaka ríkisins á Sparisjóðnum í Keflavík kostar ríkissjóð 19 milljarða króna, eða 8 milljörðum meira en gefið var út þegar sparisjóðurinn var sameinaður Landsbankanum.

„Þegar vextirnir eru teknir með nemur heildarkostnaðurinn ársframlagi ríkisins til Landspítalans sem er alls um 25 milljarðar," segir Guðlaugur

Guðlaugur segir að ekki hafi verið farið að lögum um Bankasýslu þar sem segir að allir hlutir ríkisins í bankastofnunum eigi að vera hjá Bankasýslunni. Þetta hafi ekki verið gert í tilfelli Byrs og SpKef.

„Þá ákvað Steingrímur að halda utan um þá hluti," segir Guðlaugur og telur ljóst að bæði Byr og SpKef hafi verið í fullri samkeppni við aðra banka án þess að uppfylla skilyrði um eiginfjárfhlutföll.

„Og í þriðja lagi er það ljóst að fjármálaráðuneytið leppaði fyrir kröfuhafa sem er mjög sérkennilegt í ljósi þess að kröfuhafar mega ekki eiga banka á íslandi," segir hann.

Guðlaugur sendi stjórnskipunar- og eftirlitnsnefnd erindi í október á síðasta ári þar sem hann rekur athugsemdir sínar við vinnulag Steingríms og krefst rannsóknar. Hann bendir ennfremur á að nefndin skuli hafa frumkvæði að því að kanna ákvarðanir einstakra ráðherra eða verklag þeirra. Málið er enn í nefndinni.

„Það er bara ljóst að þeir hafa ekki áhuga á að rannsaka sitt eigið fólk, það er ekkert flóknara en það," segir Guðlaugur og telur Steingrím í erfiðri stöðu.

„Það er eins og hann telji að hann sé hafinn yfir lög og reglur og geti gert bara það sem honum dettur i hug."