Iceland Express neitar ásökunum Wow Air

Iceland Express harðneitar því að hafa stundað viðskiptanjósnir með hlerun á svokallaðri Tetra-rás sem Wow Air hefur notað á Keflavíkurflugvelli. Bendir fyrirtækið á að umræddri rás hafi verið úthlutað til Iceland Express af rekstraraðila Tetra-talstöðvakerfisins.

Greint var frá því í fjölmiðlum í gær að flugfélagið Wow Air og flugþjónustan Keflavik Flight Services (KFS) hefðu kært meintar viðskiptanjósnir starfsmanna Iceland Express, þar á meðal Pálma Haraldssonar, aðaleiganda og stjórnarformanns félagsins. Er þeim gefið að sök að hafa hlerað Tetra-rás KFS, þjónustuaðila Wow Air á Keflavíkurflugvelli, í þeim tilgangi að afla upplýsinga um farþegatölur og fleira sem snýr að starfsemi Wow Air.

Fram kom í máli Skarphéðins Bergs Steinarssonar, forstjóra Iceland Express, á blaðamannafundi vegna málsins í gær að KFS þjónaði Iceland Express fram í nóvember á síðasta ári og fékk meðan á samstarfinu stóð aðgang að Tetra-rásum sem eru á leyfi Iceland Express hjá Neyðarlínunni sem annast rekstur Tetra-talstöðvakerfisins.

Nú hafi komið í ljós að KFS hafi ekki komið sér upp eigin samskiptarásum í Tetra-kerfinu eftir að samstarfinu lauk heldur notað áfram samskiptarásir Iceland Express. Í tilkynningu sem Iceland Express kynnti á blaðamannafundinum segir að það hljómi því eins og lygasaga að KFS og Wow Air hafi kært Iceland Express fyrir að hlera samskipti á rás sem Iceland Express hefur verið úthlutað. Þá hefur Iceland Express nú látið loka fyrir aðgang starfsmanna KFS að Tetra-rásum Iceland Express hjá Neyðarlínunni.

Loks kom fram á fundinum að Iceland Express hefur vissulega fylgst með farþegafjölda hjá Wow Air en það hafi verið gert með talningum inn og út úr flugvélum fyrirtækisins.- mþl