Hreiðar sakar undirmenn sína um lögbrot

Hreiðar Már Sigurðsson furðar sig á að sérstakur saksóknari hafi ekki ákært tiltekna undirmenn hans fyrir löglaust uppgjör á þrettán milljarða sjálfsábyrgð sjeiks Al Thani. Slitastjórn Kaupþings telur ábyrgðina ógreidda og hefur stefnt sjeiknum til að greiða hana.

Hreiðar Már Sigurðsson, fyrrverandi forstjóri Kaupþings, telur undirmenn sína hafa framið refsivert lögbrot 8. október 2008, sama dag og Kaupþing féll. Þá var sjeik Mohammed bin Khalifa Al Thani leyft að gera upp 12,8 milljarða króna sjálfskuldarábyrgð vegna kaupa sinna í bankanum með því að skipta 50 milljón dollurum í krónur á langtum hærra gengi en öðrum bauðst. Dollarana hafði hann fengið að láni frá Kaupþingi.

Þetta er meðal þess sem kemur fram í greinargerð Hreiðars sem lögð hefur verið fyrir Héraðsdóm Reykjavíkur vegna ákæru í Al Thani-málinu svokallaða. Í greinargerðinni ber lögmaður Hreiðars sakir af honum en lýsir jafnframt furðu á því að ekki hafi verið ákært fyrir þetta uppgjör, sem Hreiðar hafi hvergi komið nærri.

Ákærðir fyrir svik og blekkingarSérstakur saksóknari ákærði Hreiðar í febrúar fyrir umboðssvik og markaðsmisnotkun vegna lánveitinga til Al Thani og Ólafs Ólafssonar, eins stærsta eiganda Kaupþings á þeim tíma, samtals að andvirði tæpra þrjátíu milljarða. Af því notaði sjeikinn tæpa 26 milljarða til að kaupa rúm fimm prósent í bankanum eftir miðjan september 2008. Með Hreiðari eru ákærðir Sigurður Einarsson, fyrrverandi stjórnarformaður bankans, Magnús Guðmundsson, sem var forstjóri Kaupþings í Lúxemborg, og Ólafur Ólafsson.

Sérstakur saksóknari telur að lánin hafi verið veitt í þeim eina tilgangi að hífa upp verð hlutabréfa í bankanum; þau hafi verið bankanum í óhag og að ákærðu hafi blekkt markaðinn með því að gefa í skyn að fjármagn væri að koma inn í rekstur bankans frá Katar.

Dugði upp á hár fyrir uppgjörinuSjeik Al Thani gekkst í sjálfskuldarábyrgð fyrir um helmingi lánsfjárhæðarinnar, um 12,8 milljörðum, og 8. október 2008 var hún greidd að fullu. Að kvöldi sama dags féll bankinn.

Ábyrgðin var hins vegar ekki greidd á neinn venjulegan hátt. Al Thani hafði einnig fengið fimmtíu milljónir dollara lánaðar frá Kaupþingi inn á félagið Brooks Trading á Bresku Jómfrúaeyjum. Líka er ákært fyrir umboðssvik vegna þeirrar lánveitingar.

Þessir peningar voru notaðir til að greiða upp ábyrgðina. Dollurunum var skipt í krónur á sérstöku aflandsgengi sem ákveðið var af starfsmönnum Kaupþings. Það nam um 256 krónum á dollarann, og þannig vildi til að 50 milljónirnar í dollurum dugðu upp á hár til að greiða sjálfskuldarábyrgðina.

„Að öllum líkindum refsiverð“Þótt stærstum hluta af 44 blaðsíðna greinargerð Hreiðars Más vegna ákærunnar sé varið í að rökstyðja hvers vegna hann hafi ekki gerst brotlegur við lög er líka farið nokkuð ítarlega yfir Brooks-fléttuna. Og þar bregður svo við að Hreiðar Már telur auðsýnt að lög hafi verið þverbrotin.

Í greinargerðinni er talað um „fordæmalausa atburðarás“ sem „bryti gróflega gegn hagsmunum Brooks og Kaupþings“ og fullyrt að ráðstöfunin hafi verið „ólögmæt og að öllum líkindum refsiverð“.

Hún hafi ekki getað átt sér stað nema eigandi Brooks, það er Al Thani, og starfsmenn bæði Kaupþings og Kaupþings í Lúxemborg hafi vanrækt skyldur sínar.

„Ráðstöfun fjármunanna með þessum hætti var ekki möguleg nema reglur og lög væru þverbrotin og margir einstaklingar ættu þar hlut að máli, og það einstaklingar sem áttu að starfa með hagsmuni Kaupþings að leiðarljósi. Það verður því að teljast með hreinum ólíkindum að ákæra í þessu máli lúti að lánveitingunni en ekki ráðstöfuninni 8. október 2008,“ segir í greinargerðinni.

Þá er bætt við að fyrir liggi að Hreiðar hafi ekki átt neina aðkomu að málinu „og augljóst að hann hefði aldrei veitt samþykki fyrir henni“. Hann hafi ekki frétt af henni fyrr en eftir hrun bankans.

Slitastjórn vill milljarðana afturEftir þessa fléttu sat Brooks Trading eftir svo til eignalaust en skuldaði Kaupþingi 50 milljónir dollara. Það var að vonum tekið til gjaldþrotaskipta, en skiptastjóri þess á Bresku Jómfrúaeyjum hefur hins vegar lýst því yfir að uppgjörið á sjálfskuldarábyrgðinni sé ólöglegt og riftanlegt.

Af þessum sökum metur slitastjórn Kaupþings það sem svo að líklega muni þurfa að endurgreiða Brooks Trading féð, 50 milljónir dollara, og þar af leiðandi sé sjálfskuldarábyrgð sjeiksins enn ógreidd. Slitastjórnin hefur því höfðað mál á hendur Al Thani til greiðslu 12,6 milljarða vegna ábyrgðarinnar. Það mál var þingfest í Héraðsdómi Reykjavíkur 19. júní.