Klemmdi sig í Kina og hugsanlega úr leik

Golftímabilinu hjá Graeme McDowell gæti verið lokið eftir að hann slasaði sig á afar klaufalegan hátt svo ekki sé nú meira sagt.

Atvikið átti sér stað á hóteli í Kína þar sem McDowell tókst að klemma hendina á sér ansi hressilega. Hann mun fara í myndatöku á morgun og þá kemur í ljós hvort höndin sé hreinlega brotin.

McDowell reyndi að spila í gegnum sársaukann en það gekk ekki vel og hann komst ekki í gegnum niðurskurðinn á World Golf Championship.

"Hann hefur verið í meðferð og hendin er augljóslega mjög viðkvæm. Við verðum að bíða og sjá hversu slæm meiðslin eru," sagði umboðsmaður kylfingsins.