Stefnulaust háskólakerfi?

Það er margt um að vera í Háskóla Íslands. Alþingi hefur samþykkt heimild til hækkunar skrásetningargjalda úr 45.000 kr. í 60.000 kr. og innan veggja skólans eru aðgangstakmarkanir skeggræddar. Hvort tveggja eru tilraunir skólans til að bregðast við allt of litlu fjármagni og reyna eftir bestu getu að gera aðstöðu nemenda sem besta miðað við þann þrönga stakk sem skólanum er sniðinn.

Ég stend með háskólanum. Hagur okkar stúdenta er fólginn í því að skólinn sem við hljótum menntun okkar frá sé góður og að á meðan við stundum þar nám sé aðstaðan sem þarf til að þess eins og best verður á kosið. Hækkun skrásetningargjalda mun óneitanlega verða stór biti fyrir marga nemendur. En þegar háskólinn framvísar gögnum sem sýna að hann neyðist til að nýta hluta rekstrarfjár til að mæta kostnaði við skráningu nemenda er erfitt að standa í vegi umræddrar hækkunar. Fjárskorturinn kemur með beinum hætti niður á nemendum og námsgæðum í skólanum.

Í ljósi þessa er kominn tími til að yfirvöld geri grein fyrir sínu. Niðurskurður til skólans á sama tíma og leyfð er hækkun skrásetningargjalda lítur í mínum augum einfaldlega út eins og upphaf skólagjalda við Háskóla Íslands. Stúdentar eru látnir mæta niðurskurði. Þótt afmælisgjöf yfirvalda til Háskóla Íslands hafi verið vegleg á enn eftir að standa við gefin loforð og þó svo verði þarf meira til. Gjöfin kann að brúa mikilvægt bil en hún breytir ekki þeirri grundvallarskekkju sem er í fjármögnun íslenskra háskóla. Háskóli Íslands fær ekki greitt með öllum þeim sem stunda nám við skólann.

Á sama tíma eru atvinnuleitendur hvattir í nám og skólinn vex ört. Það liggur í augum uppi að þetta mun ekki ganga til lengdar og nú þegar stefnir í að gerðar verði grundvallarbreytingar á inntöku stúdenta í Háskóla Íslands.

Því spyr ég – hvers konar háskólakerfi vilja yfirvöld hafa á Íslandi? Nú er rétti tíminn til að móta það til framtíðar og bæta þá galla sem allt of lengi hafa verið á því. Nóg er komið af því að aðeins sé horft fjögur ár fram í tímann, stúdentar kalla eftir framtíðarsýn um fjármögnun og rekstur íslenskra háskóla.