Kosið um stjórnarskrá og fimm lykilmál samhliða forsetakosningum

Meirihluti stjórnskipunar- og eftirlitsnefndar Alþingis samþykkti á fundi sínum í morgun að kosið verði um tillögu stjórnlagaráðs um nýja stjórnarskrá og fimm grundvallarmál samhliða forsetakosningum hinn 30. júní næstkomandi.

Vefsvæðið Smugan greindi frá því í morgun að kosið yrði um tillögu stjórnlagaráðs samhliða forsetakosningum, en samkvæmt upplýsingum frá stjórnskipunar- og eftirlitsnefnd verður tvíþættur kjörseðill lagður fram samhliða forsetakjöri hinn 30. júní. Fyrst verður lögð fram svohljóðandi spurning, þar sem kjósendur eru beðnir um að taka afstöðu til tillögu stjórnlagaráðs að nýrri stjórnarskrá:

1. Vilt þú að tillaga stjórnlagaráðs verði lögð fram sem frumvarp að nýrri stjórnarskrá eftir að hún hefur verið yfirfarin með tilliti til laga og alþjóðasamninga?

Eins og sést á spurningunni er fyrirvari um að tillögu ráðsins verði breytt eftir að þjóðin hefur tekið afstöðu til spurningarinnar. Er í raun áskilið í spurningunni að tillögunni kunni að verða breytt. Í síðari lið kjörseðilsins verða kjósendur beðnir, samkvæmt upplýsingum fréttastofu, um að taka afstöðu til fimm grundvallarmála með svohljóðandi já eða nei spurningum:

2. Vilt þú að í nýrri stjórnarskrá verði:

1) Náttúruauðlindir lýstar þjóðareign?

2) Ákvæði þjóðkirkju óbreytt frá því sem nú er?

3) Persónukjör í kosningum heimilað í meira mæli en nú er?

4) Ákvæði um að atkvæði kjósenda alls staðar af landinu vegi jafnt?

5) Ákvæði um að tiltekinn hluti kosningabærra manna geti farið fram á þjóðaratkvæðagreiðslu? Ef já, hversu hátt hlutfall á þetta að vera 10%, 15% eða 20%?

Samkvæmt upplýsingum frá stjórnskipunar- og eftirlitsnefnd hyggst meirihluti nefndarinnar leggja þingsályktunartillögu þess efnis fram á þingi síðar í dag. Eins og sést má velta því fyrir sér hvort spurningarnar á kjörseðlinum stangist á, enda ef meirihluti kjósenda samþykkir eitthvað í síðari liðnum sem ekki er að finna í tillögu stjórnlagaráðs þá liggur í hlutarins eðli að breyta þurfi tillögu ráðsins í samræmi við það. thorbjorn@stod2.is