Lögreglan ekki eins sýnileg og áður

Almenningur telur lögregluna ekki nærri því eins sýnilega og áður var, samkvæmt niðurstöðum þolendakönnunar sem gerð var á vegum Ríkislögreglustjóra. Könnunin nær til ársins 2010 en niðurstöðurnar voru fyrst birtar opinberlega í morgun.

Niðurstöðurnar sýna að 17% svarenda sjá lögreglumann eða lögreglubíl í byggðarlagi sínu nær daglega eða oftar. Árið 2008 var hlutfallið hins vegar mun hærra, eða 30% og árið 2007 var það 32%. Að sama skapi fjölgar þeim gríðarlega sem segjast sjá lögreglumann eða lögreglubíl sjaldnar en mánaðarlega. Árið 2010 voru þeir 21% en voru 11,7% árið 2007.

Samkvæmt upplýsingum Vísis er talið að ein ástæðan fyrir þessum minnkandi sýnileika lögreglunnar sú að lögreglan er einfaldlega ekki eins mikið á ferð og hún var. Upplýsingar um akstur lögreglubíla styðja þessa skýringu en akstur lögreglubíla á höfuðborgarsvæðinu hefur til að mynda minnkað um 31% á árunum 2007 - 2011. Á árinu 2007 voru tæplega 1996 þúsund kílómetrar eknir á höfuðborgarsvæðinu. Á árinu 2011 voru aftur á móti 1383 þúsund kílómetrar eknir.

Aksturinn hefur minnkað í öllum lögregluumdæmum, nema á Suðurnesjum þar sem hann hefur aukist um 2%. Aksturinn hefur minnkað um meira en helming í tveimur lögregluumdæmum á landinu. Það er Akranes og Blönduós.

Fyrrnefnd þolendakönnun lögreglunnar var framkvæmd dagana 20. maí til 21. júní 2011. Úrtakið var 4.007 manns á öllu landinu, 18 ára og eldri. Það var Capacent Gallup sem sá um könnunina.