Nowitzky í aðgerð - Frá í sex vikur

Dirk Nowitzky, Þjóðverjinn öflugi í liði Dallas Mavericks, verður frá næstu sex vikurnar eða svo eftir að hafa gengist undir aðgerð á hné.

Hann hefur aðeins getað spilað í einum leik af fjórum á undirbúningstímabilinu en nú er hætt við því að Nowitzky muni missa af fyrstu sextán leikjum Dallas á tímabilinu í NBA-deildinni.

Dallas varð meistari vorið 2011 en náði ekki að fylgja titlinum eftir á síðasta tímabili. Liðið komst í úrslitakeppnina í vor en var sópað úr leik af Oklahoma City strax í fyrstu umferð.

Dallas hefur styrkt sig með nokkrum ungum leikmönnum í sumar, til að mynda Darren Collison og OJ Mayo, og ætlar sér að gera betur en á síðasta tímabili. En ljóst er að þá þarf Nowitzky að vera heill heilsu.

Nowitzky hefur aðeins misst af fimmtán leikjum síðustu fjögur ár í NBA-deildinni.