Bankarnir mega ekki hafa hag af verðbólgu

„Séu þessar tölur hjá Ólafi réttar, þá afhjúpa þær auðvitað eina af þeim ógöngum sem verðtryggingin leiðir til," segir Helgi Hjörvar, formaður efnahags- og viðskiptanefndar Alþingis.

Ólafur Margeirsson, hagfræðingur og doktorsnemi við háskólann í Exeter, segir að íslensku bankarnir hafi síðustu tólf mánuði hagnast um 8,9 milljarða af verðtryggingunni, án þess að gera neitt. Þetta megi lesa út úr nýrri skýrslu Seðlabankans um fjármálastöðugleika þar sem fram kemur að verðtryggingarmisvægi viðskiptabankanna er jákvætt um 208 milljarða króna.

„Þetta afhjúpar líka hve óheppilegur allur ójöfnuður er í efnahag bankanna. Bankarnir eiga að reka sig á vaxtamun og þóknunartekjum en það er óheppilegt ef þeir hafa beinan hag af verðbólgu," segir Helgi. „Það hefur auðvitað mikilvægt að allir helstu aðilar í efnahagslífinu hafi hag af verðstöðugleika og vinni að honum án þess þó að ég sé að ætla mönnum það að vera ekki að því," bætir Helgi við að lokum.