Metáhorf á leik Oklahoma City og Miami

Fyrsti leikur Oklahoma City og Miami í lokaúrslitum NBA-deildarinnar í körfubolta fékk metáhorf hjá bandarísku ABC sjónvarpsstöðinni.

Aldrei áður hafa jafn margir fylgst með útsendingu stöðvarinnar frá fyrsta leik í lokaúrslitum en aukningin frá því í fyrra er meira en tíu prósent.

Gamla metið átti fyrsti leikur í rimmu LA Lakers og Detroit Pistons árið 2004. Sérstaklega var mikið horft á leikinn í fyrrinótt í Oklahoma-borg, þar sem borgarbúar eru afar áhugasamir um gengi sinna manna.

Oklahoma City vann leikinn en næsti leikur rimmunnar fer fram á heimavelli liðsins í nótt. Hann verður vitanlega sýndur í beinni útsendingu á Stöð 2 Sport og hefst útsending klukkan eitt eftir miðnætti.