Pétur Kr. Hafstein hættir sem forseti kirkjuþings

Pétur Kr. Hafstein, forseti kirkjuþings, hefur af heilsufarsástæðum sagt af sér embætti forseta og jafnframt þingfulltrúastarfi fyrir Suðurprófastsdæmi, 9. kjördæmi kirkjuþings. Þetta kemur fram í tilkynningu frá Þjóðkirkjunni. Pétur lætur jafnframt af öðrum trúnaðarstörfum í þágu þjóðkirkjunnar.

„Fyrsti varaforseti kirkjuþings, Margrét Björnsdóttir, tekur við embætti forseta kirkjuþings uns kosið hefur verið til embættisins að nýju á kirkjuþingi í nóvember næstkomandi," segir ennfremur.

Karl Sigurbjörnsson, biskup Íslands, þakkar Pétri fyrir ómetanlegt framlag í þágu kirkjunnar og segir hann hafa þjónað kirkju sinni af mikilli trúmennsku og yfirburðaþekkingu. „Hann hefur verið einstaklega traustur samstarfsmaður, ötull og einbeittur forystumaður á tímum mikilla umbreytinga og átaka. Ég bið honum og fjölskyldu hans blessunar Guðs við þessi þáttaskil, að hann megi ná góðum bata, heilsu og kröftum á ný."