Eins og bólgueyðandi lyf við alvarlegum sjúkdómi

Bjarni Benediktsson, formaður Sjálfstæðisflokksins, segir það framlag sem ríkisstjórnin ákvað í gær að leggja í Íbúðalánasjóð, allt að þrettán milljarða, virka eins og bólgueyðandi lyf á alvarlegan sjúkdóm. Hann segir með ólíkindum að stjórnvöld hafi ekki reiknað með því að þurfa að koma Íbúðalánasjóði til aðstoðar í fjárlögum 2013. „Þessar upphæðir eru með þeim hætti, að það er ábyrgðarlaust að reikna ekki með þessu í fjárlögum fyrir næsta ár," segir Bjarni. Hann segir auk þess að kerfisvandi sjóðsins hafi ekki verið greindur nægilega vel af stjórnvöldum, og að það sé slæmt að stjórnvöld hafi ekki gert sér grein fyrir alvarlegri stöðu hans, og gripið til aðgerða fyrr.

Samkvæmt skýrslu IFS um málefni Íbúðalánasjóðs, þarf sjóðurinn 22,5 milljarða króna frá ríkissjóði á næstu þremur árum til þess að styrkja eiginfjárgrunn sinn. Bjarni segir að nálgast þurfi vandamál sjóðsins af miklu meiri festu en stjórnvöld hafi gert hingað til, enda felist alvarleiki málsins í því að ríkissjóður beri ábyrgð á öllum skuldbindingum sjóðsins. Heildarskuldir hans námu um mitt þetta ár 870 milljörðum og eignir 876 milljörðum, og eiginfjárhlutfallið því 1,4 prósent.  „Sjóðurinn er samofinn lífeyriskerfi landsins, og að mínu mati má ekki fresta aðgerðum til þess að taka á hinum raunverulegu vandamálum sjóðsins, sem tengjast ekki bara skorti á eigin fé, heldur kerfislægum vandamálum einnig. Það verður að kortleggja þessi vandamál. Þau þola enga bið, og að mínu mati er það ábyrgðarlaust hjá stjórnvöldum að taka ekki fyrr á þessum málum, og fresta nauðsynlegum aðgerðum enn frekar. Það einfaldlega gengur ekki," segir Bjarni.