Jón Daði með tilboð frá Silkeborg

Danska liðið Silkeborg mun hafa gert Jóni Daða Böðvarssyni samningstilboð samkvæmt dönskum fjölmiðlum.

Jón Daði hefur verið einn besti leikmaður Selfyssinga síðustu tímabil og hafa nokkur lið á Norðurlöndunum sýnt honum mikinn áhuga.

Magnús Agnar Magnússon, umboðsmaður hans, segir að hann sé nú staddur í Svíþjóð þar sem hann muni æfa með Djurgården í tíu daga. Þá er norska liðið Viking einnig sagt hafa augastað á kappanum.

Jón Daði var lánaður til AGF í Danmörku í fyrra og var svo í lykilhlutverki með Selfossi í Pepsi-deild karla í sumar.

Bjarni Þór Viðarsson er nú á mála hjá Silkeborg.