Færeyingar bíða fregna af borpallinum

Færeyingar bíða nú spenntir fregna af dýrustu og viðamestu olíuborun á landgrunni Færeyja til þessa. Það var þann 17. júní í sumar sem kínverski borpallurinn Cosl Pioneer hóf að bora allt að fimm kílómetra djúpa holu og þá var tilkynnt að borunin tæki 4-5 mánuði.

Olíufélögin sem standa að þessari 20 milljarða króna borun hafa, enn sem komið er, ekkert sagt frá gangi mála. Það þykir þó eðlilegt þar sem venjan er í olíuheiminum að greina ekki frá árangri fyrr en borun er lokið.

Við upphaf borana í sumar sagði færeyski netmiðillinn oljan.fo að það yrði í október eða nóvember „sem við vitum hvort Statoil finnur arðbæra olíulind og leggur grunninn að færeyska olíuævintýrinu," eins og sagði í fréttinni. Í Færeyjum reyna menn þó að halda niðri væntingum, minnugir þess að þetta er áttunda holan sem olíufélög bora við Færeyjar á tíu árum, en sjö fyrri holurnar hafa til þessa einungis skilað óverulegu magni af gasi. Þá hefur verið haft eftir sérfræðingum að líkurnar á að Færeyingar detti nú í lukkupottinn séu taldar einn á móti fimm.

Hitti borinn á annað borð á olíulind er hins vegar talið að það gæti orðið mjög stór olíufundur og hagnaðurinn mikill, sem myndi umbylta færeysku samfélagi.

Þrjú félög standa að verkefninu; norska félagið Statoil með 50%, bandaríska félagið ExxonMobil með 49% og færeyska félagið Atlantic Petroleum með 1% hlut. Borsvæðið er suðaustur af Færeyjum, um 30 kílómetra frá lögsögumörkunum við Bretlandseyjar. Þar er hafdýpi milli 400 og 500 metrar, en bora átti undir hraunlög sem þar liggja djúpt.

Sérfræðingur Olíustofnunar Noregs hefur lýst því mati sínu að niðurstöðurnar sem fást í Færeyjum geti haft áhrif á framvindu olíuleitar á Jan Mayen-hryggnum, vegna svipaðra jarðlaga. Íslendingar hafa því, rétt eins og Færeyingar, ástæðu til að bíða spenntir eftir niðurstöðunum. Ekki aðeins gætu þær aukið áhuga á olíuleit í lögsögu Íslands heldur gæti olíufundur á færeyska landgrunninu jafnframt sogað til sín vinnuafl í stórum stíl frá nágrannaríkjum eins og Íslandi.