Ólafur Darri einn sá hæfileikaríkasti að mati Ben Stillers

Leikarinn Ólafur Darri Ólafsson fær toppeinkunn hjá stórleikaranum Ben Stiller sem birtir óárennilega mynd af Ólafi á Twitter-síðu sinni. Eins og sést á myndinni skartar Ólafur Darri vígalegu skeggi, eins og vanalega, en í þetta skiptið heldur hann á borvél með heldur ógnandi hætti.

Ólafur er nú við tökur á kvikmynd Stillers, The secret life of Walter Mitty. Ólafur er svo sem ekki óvanur stórstjörnunum enda lék hann þokkalega stórt hlutverk í kvikmyndinni Contraband ásamt Mark Walhberg sem sagði þá í viðtali við Fréttablaðið að Ólafur Darri væri magnaður leikari.

Þessa dagana geta íslenskir kvikmyndaunnendur þó séð Ólaf Darra í kvikmyndinni Djúpinu en þar eru allir gagnrýnendur sammála um að Ólafur eigi stórleik í aðalhlutverki.