Magnús Kristinsson: Ég er fórnarlamb markaðsmisnotkunar

Magnús Kristinsson, útgerðarmaður í Vestmannaeyjum, segir að salan á fyrirtæki sínu, Bergur Huginn, til Síldarvinnslunnar sé ekki sín óskaniðurstaða. Tilkynnt var um söluna í dag.

„Helst hefðum við í fjölskyldunni viljað reka áfram okkar útgerð hér í landi í Vestmannaeyjum. Ég hef allt frá haustinu 2008 glímt við miklar skuldir við Landsbankann sem að mestu urðu til við kaup á hlutum í bankanum. Ég var þar eitt margra fórnarlamba grófrar markaðsmisnoktunar eins og síðar hefur komið á daginn. Ég hefði helst viljað halda félaginu og standa skil á skuldum við bankann en hlýt nú að horfast í augu við að það mun ekki takast," segir Magnús.

Hann segist því ekki eiga neinn annan kost en að selja hluti sína í félaginu enda blasi við að áform um að auka gjaldheimtu af sjávarútveginum muni skerða rektrarhæfi útgerðarfélaga og þá ekki síst þeirra minni. Samhliða sölunni nú hafi farið fram fullt skuldauppgjör við Landsbankann. „Það er með eftirsjá en stolti sem ég skil við fyrirtækið núna og þá fjölmörgu samstarfsmenn sem ég hef átt þar. Félagið er í góðum rekstri núna og gerir út tvö af bestu skipum íslenska fiskveiðiflotans í dag. Ég óska nýjum eigendum velfarnaðar," segir Magnús.