Skuldarar í gengislánamálunum geta fengið aðstoð

Svanborg Sigmarsdóttir, upplýsingafulltrúi hjá Umboðsmanni skuldara, segir að skuldararnir í prófmálunum 11 sem eiga að varpa ljósi á gengislánamálin megi hafa ákveðið samráð. Til þess þurfi þeir að hafa samband við embætti Umboðsmanns skuldara sem veiti þá alla aðstoð sem mögulegt er.

Guðmundur Andri Skúlason, formaður Samtaka lánþega, hélt því fram á Vísi í gær að skuldararnir í málunum hefðu engin tök á að hafa samráð og samstilla kröfur sínar á málunum. Því væri hætta á að málin yrðu illa unnin að hálfu skuldaranna. Fjármálafyrirtækin hefðu hins vegar fengið leyfi til samráðs í málunum.

Öfugt við þetta segir Svanborg að skuldararnir þurfi ekki að standa einir í málunum. „Skuldurunum er velkomið að fá ráðgjöf og upplýsingar hjá umboðsmanni skuldara," segir hún en embættið getur veitt ýmiss konar upplýsingar í málunum og stuðlað að því að kröfurnar séu samhæfðar. Til þess að það gerist verði hins vegar skuldararnir að setja sig í samband við embættið.

„En það eru bara ekki allir skuldararnir búnir að hafa samband við okkur," segir Svanborg. Hún segir að skuldararnir verði að gera það sem fyrst, en málin verða brátt þingfest og þá munu þau fá flýtimeðferð í dómskerfinu.

EFTA dómstóllinn

Svanborg tekur hins vegar undir það með Guðmundi að málin geti tafist töluvert ef farið verður fram á ráðgefandi álit EFTA dómstólsins í þeim. Guðmundur telur að álitamálið hvort heimilt sé að endurákvarða vexti á lánunum skuldara í óhag verði sent til dómstólsins. Það gæti vel tafið öll málin í 1-2 ár.