Daði Már: Inntökupróf í hagfræðideild vel heppnað

Um fjörutíu nemendur náðu inntökuprófi í hagfræðideild Háskóla Íslands af 45 sem tóku prófið.  Daði Már Kristófersson kennari við hagfræðideild segir að vel hafi tekist til með inntökuprófið.

Ákveðið var að setja á fót nýtt inntökuferli fyrir nemendur við hagfræðideild Háskóla Íslands í haust og þurftu þeir, sem voru að byrja í námi við deildina, að ná lágmarki í inntökuprófi.

Samtals skráðu um 75 nemendur sig í prófið, en þegar á hólminn var komið mættu 45 nemendur í það. Um 40 nemendur af þeim stóðust þær kröfur sem deildin seitti í prófinu, og segir Daði Már Kristófersson, kennari við hagfræðideildina og dósent, að vel hafi tekist til.

„Þeir nemendur sem nú byrja nám eru betur undirbúnir en að jafnaði á sama tíma undanfarin ár,“ segir Daði.

Daði segist vera hlynntur því að Háskóli Íslands taki inntökuprófin upp í fleiri deildum, þar sem þau hjálpi til við undirbúning nemenda, aukið skilvirkni í kennslu og geti aukið faglega vinnu innan skólans til framtíðar litið.