Sérstakur fær lykilgögn frá Lúxemborg vegna FL Group máls

Sérstakur saksóknari fékk loksins í vor afgreidda réttarbeiðni í Lúxemborg til að geta rekið slóð umdeildrar þriggja milljarða króna millifærslu frá FL Group inn á reikning Kaupþings í Lúxemborg. Efnahagsbrotadeild ríkislögreglustjóra og síðar sérstakur saksóknari hafa nú í rúm þrjú ár verið að rannsaka málið, án niðurstöðu.

Hannes Smárason, þáverandi stjórnarformaður FL Group, er talinn hafa hlutast til um að þrír milljarðar króna voru millifærðir af reikningi FL Group reikning hjá Kaupþingi í Lúxemborg í apríl 2005.

Millifærslan átti sér stað án vitneskju þáverandi forstjóra FL Group, Sigurðar Helgasonar, Ragnhildar Geirsdóttur, sem var að taka við starfi forstjóra og stjórnar félagsins, en þrír stjórnarmenn sögðu sig úr stjórninni þegar málið kom upp, en þetta voru þau Inga Jóna Þórðardóttir, Árni Oddur Þórðarson og Hreggviður Jónsson.

Ragnhildur Geirsdóttir tók við sem forstjóri en sagði starfi sínu lausu meðal annars vegna umrædds máls. Peningarnir skiluðu sér inn á reikning FL Group með vöxtum, fyrir lok júní 2005 eftir að Ragnhildur hafði gengið hart á eftir því og meðal annars haft beint samband við forstjóra Kaupþings.

Excel skjal varpar ljósi á málið

Í yfirlýsingu sem Ragnhildur sendi frá sér vegna umfjöllunar um málið í skýrslu rannsóknarnefndar Alþingis sagði hún: „Hvar voru svo peningarnir niður komnir? Stjórnarformaður FL Group gaf aldrei viðunandi skýringu á því, að mínu mati. Hins vegar barst á þessum tíma útprentun úr Excel skjali frá Kaupþingi í Lúxemborg þar sem fram komu upplýsingar sem mátti skilja sem svo að peningarnir hefðu á einhverjum tímapunkti, í einhverjum tilgangi, verið millifærðir á Fons."

Málið var rannsakað af efnahagsbrotadeild ríkislögreglustjóra og síðar sérstökum saksóknara eftir að deildin var sameinuð embættinu, vegna gruns um fjárdrátt samkvæmt auðgunarbrotakafla hegningarlaga.

Það var síðan fyrst í vor sem stjórnvöld í Lúxemborg afgreiddu réttarbeiðni sérstaks saksóknara vegna málsins. Þá var lagt alveg sjálfstætt mat á sakarefnið eftir að málið fluttist yfir til embættisins frá efnahagsbrotadeildinni.

Samkvæmt heimildum fréttastofu er grunur um að peningarnir hafi farið inn á reikning Fons hjá Kaupþingi í Lúxemborg. Fjárdráttur telst fullframinn þegar peningar hafa verið teknir, en síðan er sjálfstætt álitaefni hvernig með eigi að fara þegar peningar eru endurgreiddir, en það er ekki óalgengt í auðgunarbrotamálum að menn leitist við að endurgreiða féð og koma þannig á lögmætu ástandi að nýju. Það breytir hins vegar ekki eðli brotsins, þar sem háttsemin er alveg jafn saknæm fyrir vikið.

Fréttastofa óskaði eftir viðbrögðum frá verjanda Hannesar, Gísla Guðna Hall, en hann hafði ekki svarað skilaboðum nú fyrir fréttir. Fréttastofan náði síðan tali af Gísla nú undir kvöld og bar undir hann efni fréttarinnar. Hann vildi ekki tjá sig.

Hannes Smárason hefur alla tíð lýst því yfir að ekkert ólögmætt eða saknæmt hafi átt sér stað í tengslum við umrædda millifærslu, en hann hefur nú þurft að bíða eftir niðurstöðu í þessu máli í rúm þrjú ár. Hannes er búsettur í Barcelona þar sem hann er sjálfstætt starfandi og sinnir m.a fjárfestingum.