Segir ekki mikla kreppu í verslun með sumarhús

„Það virðist nú ekki vera mikil kreppa í þessum bransa sko," segir Gunnar Þorgeirsson, oddviti sveitarstjórnar í Grímsnes- og Grafningshreppi, um verslun með sumarbústaði. Hann segir að í Grímsnesi hafi talsvert verið um byggingu nýrra sumarhúsa á liðnu ári.

Í Fréttablaðinu í dag birtist úttekt um sölu sumarhúsa á síðustu árum. Þar kom fram að lítið sem ekkert hefði verið um byggingar á nýjum sumarhúsum fyrstu þrjú árin eftir efnahagshrunið. Nú sé velta á nýjum kaupsamningum að aukast en framkvæmdir hafi lítið glæðst.

Gunnar segir að frá hruni hafi bygging sumarhúsa ekki lagst algerlega af í Grímsnesi. „Þetta er náttúrlega ekkert eins og 2006 og 2007. Það var náttúrlega bara geðveiki. En það er samt verið að þétta eldri sumarhúsabyggðir," segir hann.

Hann segir töluverða eftirspurn eftir sumarhúsum í gömlum og grónum sumarhúsahverfum eins og Grímsnesi.

Gunnar segir að sumarhúsin séu gríðarlega mikið notuð. „Svona yfir sumartímann notar fólk þetta bara sem sitt annað heimili," segir hann.