Sér ekkert óeðlilegt við kaupin

„Ég sé ekki alveg hvað er óeðlilegt við það," segir Þorgeir Baldursson, forstjóri Kvosar um kaup fyrirtækisins á Plastprenti, en Kvos hafði áður fengið milljarða afskriftir hjá Landsbankanum og Arion banka.

Kristþór Gunnarsson, framkvæmdastjóri Ísafoldarprentsmiðju, skrifaði grein í Fréttablaðið í gær þar sem hann gagnrýnir söluna. Hann bendir á að Kvos hafi þurft að sýna fram á 250 milljóna króna greiðslugetu til að skila tilboði í Plastprent og spyr hvaða þeir peningar hafi komið. „Voru þeir til? Hefði þá ekki verið rétt að afskrifa minna?"

Þorgeir bendir á að Kvos hafi heimild til að auka hlutafé sitt, rétt eins og aðrir. „En við getum bara aukið hlutafé ef við erum að byggja upp félagið að nýju. Það liggur í augum uppi," segir hann.

Aðspurður um hvort það sé sanngjarnt að Kvos fái að kaupa umrætt fyrirtæki svo stuttu eftir milljarða afskriftir segist Þorgeir ekki ætla að dæma um sanngirnina á bak við fjárhagslega endurskipulagningu fyrirtækja. „Það sem við lentum í var að erlend starfsemi Kvosar fór illa," segir hann en starfsemin nefnist Infopress og er erlend prentsmiðja sem var í eigu Kvosar. „Landsbankinn átti veð í þeirri starfsemi en vildi ekki taka það yfir. Við það töpuðust töluverðir fjármunir," segir Þorgeir en samkvæmt honum er það gjörningurinn sem felur í sér stóran hlut af afskriftum Kvosar. Hann bendir á að félagið er í mjög góðum rekstri í dag og er milljarða virði

„Kvos var tekin til endurskipulagningar. Hún var unnin mjög faglega en að sjálfsögðu töpuðu hluthafar öllu sínu hlutafé og tóku á sig mikinn skell. Svo það er ekkert bara hægt að tala um einhverja ósanngirni í þessu," segir Þorgeir.

„Nú eru þessi kaup náttúrlega bara í meðhöndlun hjá Samkeppniseftirliti og bara í eðlilegum farvegi þar," segir Þorgeir og telur að í raun sé ekki meira um málið að segja.