Mikil spenna í kvennaflokknum á Hellu | Valdís í efsta sæti

Valdís Þóra Jónsdóttir úr Golfklúbbnum Leyni er í efsta sæti í kvennaflokki að loknum fyrsta keppnisdegi á Íslandsmótinu í höggleik á Eimskipsmótaröðinni. Valdís Þóra lék Strandarvöll á Hellu á einu höggi yfir pari eða 71 höggi. Guðrún Pétursdóttir úr GR og Tinna Jóhnnsdóttir úr Keili eru báðar á 73 höggum eða 3 höggum yfir pari vallar.

Eygló Myrra Óskarsdóttir úr GO er á 74 höggum eða 4 höggum yfir pari og sömu sögu er að segja af Signý Arnórsdóttir úr Keili.

Guðrún Brá Björgvinsdóttir úr Keili var langt frá sínu besta í dag en hún lék á 76 höggum.

Ólafía Þórunn Kristinsdóttir, Íslandsmeistarinn frá því í fyrra, lék ekki vel og er hún á 77 höggum.

Aðstæður voru erfiðari síðdegis á Strandarvelli þegar konurnar hófu leik. Vindurinn blés af mun meiri krafti en fyrr um daginn. Og miklar tafir voru á hringnum sem gerðu það að verkum að keppendur voru flestir að nota 5 ½ tíma að ljúka við 18 holur.

„Ég fékk fjóra fugla og fimm skolla, ég var ánægð með fuglana en ekki hitt," sagði Valdís eftir hringinn í dag en hún hefur ekki keppt á Eimskipsmótaröðinni á þessu tímabii og er Íslandsmótið fyrsta mót hennar á þessu sumri. „Ég var í Bandaríkjunum í námi fram á mitt sumar og en ég hef æft vel og það var mikil tilhlökkun hjá mér fyrir þetta mót," sagði Valdís en hún varð Íslandsmeistari í Grafarholtinu árið 2009.

Ólafía Þórunn var ekki sátt við útkomuna eftir að hafa leikið á 77 höggum. „Það var bara ekkert að ganga upp. Það var ýmislegt sem kom uppá, tvöfaldur skolli á 17., og ég fékk aðra „sprengju" á hringnum og ég er búinn að gleyma því hvar ég fékk hana," sagði Ólafía en hún hefur ekki gefið upp vonina um að verja titilinn. „Ég var í 4. eða 5. sæti eftir fyrsta keppnisdaginn í fyrra í Leirunni, kannski finnt mér bara best að hafa þetta svona," sagði Ólafía Þórunn.