Hámarkslánsfjárhæð Íbúðalánasjóðs of lág

Ástæðan fyrir því að markaðshlutdeild Íbúðalánasjóðs hefur minnkað um nær helming á einu ári er ekki sú að sjóðurinn býður ekki upp á óverðtryggð lán. Þetta segir Hallur Magnússon, fyrrverandi sviðsstjóri þróunardeildar sjóðsins. „Meginástæðan er að hámarkslánsfjárhæð hjá Íbúðalánasjóði er 20 milljónir," segir Hallur. Fjárhæðin hefur ekki hækkað frá því í júní 2008.

Hallur telur að meðalverð íbúða á höfuðborgarsvæðinu sé 30 milljónir króna. Og þar sem fólki dugi ekki 20 milljóna króna lán Íbúðalánasjóðs leiti það til annarra fjármálastofnana.

Fram kom á Vísi í gær að Íbúðalánasjóður hefði lánað um 45% færri lán það sem af er þessu ári miðað við sama tíma í fyrra. Forstjóri Íbúðalánasjóðs taldi skýringuna liggja í því að sjóðurinn hefur ekki boðið upp á óverðtryggð lán öfugt við aðrar fjármálastofnanir. Hallur blæs á þessar skýringar og telur raunverulegu skýringuna liggja í of lágri hámarksfjárhæð lána.

Hallur fullyrðir sömuleiðis að hægt hafi á uppbyggingu á fasteignamarkaði sökum þess að hámarksfjárhæð Íbúðalánasjóðs hafi verið of lág of lengi. Hallur telur að lengri tíma taki að reisa ný hús vegna þessa.