„Ótrúlega góð stemning“ á druslugöngu - myndir

Fjöldi fólks kom saman með frumleg skilti í góðu veðri og gekk hina Meintu-druslugöngu á laugardaginn var.

Gangan var farin í annað sinn hér á landi í ár. „Þetta voru eflaust nokkur þúsund manns," segir Ásgeir Guðmundsson sem var kynnir á viðburðinum. Hann er ánægður með þá miklu umfjöllun sem gangan hefur hlotið.

„Það var ótrúlega góð stemning og jákvæður andi sem sveif þarna yfir vötnum. Þegar ég vaknaði um morguninn og las leiðarann í Fréttablaðinu þá fannst mér eins og eitthvað væri að gerast. Allir vindar samfélagsins blésu í segl umræðunnar og hún var miklu jákvæðari en verið hefur. Maður fékk á tilfinninguna að það væru einhverjar breytingar að fara að eiga sér stað," segir Ásgeir.

Fylkingin gekk frá Skólavörðuholti, niður Skólavörðustíg og endaði á Lækjartorgi. Þar voru fluttar ræður og spiluð tónlist. Hér á Vísi má skoða myndaalbúm frá göngunni. Myndirnar eru fengnar með góðfúslegu leyfi þeirra sem stóðu að göngunni.

Veðrið lék við göngufara sem margir hverjir báru litrík og sniðug skilti.