Breytingar á laxastiga við Steinboga í biðstöðu

Skipulags- og mannvirkjanefnd Fljótsdalshéraðs hefur frestað afgreiðslu erindis um breytingar á áður samþykktum fiskistiga við svokallaðan Steinboga í Jökulsá á Dal. Stiginn á að opna laxfiskum tugkílómetra leið á efri hluta Jöklu.

Veiðifélagið vill nú lengja stigann um 20 metra og gera breytingar til að minnka notkun steypu.

Skipulags- og mannvirkjanefnd hyggst fá umsagnir frá Umhverfisstofnun, Skipulagsstofnun, Fiskistofu og umhverfis- og héraðsnefnd auk þess að kynna almenningi framkvæmdina áður en breytingarbeiðnin er afgreidd.

Í tölvupósti frá Arnari Ingólfssyni til Skipulagsstofnunar segir að framkvæmdin við laxastigann sé ótímabær og þess óskað að hún sé stöðvuð. Mannvirkjanefnd Fljótsdalshéraðs segir að í tölvupósti Arnars, sem borist hafi víða, felist ásökun um að skipulags- og byggingarfulltrúi sveitarfélagsins starfi fyrir framkvæmdaraðilann. Þessu hafnar nefndin afarið.

Þá óskaði Skipulagsstofnun eftir upplýsingum frá sveitarstjórninni um það hvort framkvæmdirnar sem þegar eru hafnar við Steinboga séu í samræmi við samþykkt og útgefið framkvæmdaleyfi. Mannvirkjanefndin segir framkvæmdinar í fullu samræmi við framkvæmdaleyfi sem gefið var út í desember í fyrra og sé í gildi.

"Nefndin bendir á að með fyrirhugaðri breytingu er verið að auka líkur á að framkvæmdin skili þeim árangri sem henni er ætlað. Einnig að stefnt er á að nota enga steypu við gerð fiskvegar en ekki hægt að útiloka það," segir mannvirkjanefndin.