Thompson: Fullt af fólki veit ekki hver ég er

Hinn lítt þekkti Bandaríkjamaður, Michael Thompson, er efstur á opna bandaríska meistaramótinu í golfi, US Open, eftir fyrsta keppnisdag. Thompson lék á fjórum höggum undir pari í gær og er þrem höggum á undan Tiger Woods, David Toms, Nick Watney, Justin Rose og Graeme McDowell.

Keppt er á hinum afar erfiða Olympic Club's Lake-velli og lentu fjölmargir kylfingar í miklum vandræðum með völlinn. Það segir sína sögu að aðeins sex kylfingar hafi leikið undir pari.

Hinn 27 ára gamli Thompson byrjaði ekki vel í gær og fékk skolla á fimmtu og sjöttu holu. Hann svaraði því með fimm fuglum á næstu átta holum.

"Leyfið Tiger að fá sviðsljósið. Ég kæri mig ekki um það. Ég hugsa bara um að fara út á völlinn og spila mitt golf," sagði Thompson eftir hringinn góða.

"Auðvitað er ég samt í sviðsljósinu núna en fullt af fólki hefur ekki hugmynd um hver ég er. Ég er mjög ánægður með það því ég hef alltaf verið gaurinn sem fær að fljóta með. Ég gefst samt ekki auðveldlega upp og er stoltur af því."