Sögðu lán til stjórnenda Kaupþings jafn trygg og annarra

Veð fyrir lánum til stjórnenda Kaupþings voru veikari en hjá öðrum viðskiptavinum bankans þó hinu gagnstæða hafi verið haldið fram í árshlutauppgjöri bankans á árinu 2008, að því er fram komi í máli lögmanns þrotabús Kaupþings fyrir dómi í dag. Þrotabúið krefst þess að Sigurður Einarsson greiði 550 milljónir.

Í Héraðsdómi Reykjavíkur í morgun krafðist lögmaður þrotabúss Kaupþings þess að Sigurður Einarsson, fyrrverandi stjórnarformaður bankans, myndi greiða 550 milljóna króna skuld. Hún er þó aðeins tíu prósent af heildarlánum bankans til hans vegna kaupa á hlutabréfum.

Sigurður hefur neitað því að greiða skuldina, og horfir m.a. til ákvörðunar æðstu stjórnar bankans frá 25. september 2008, um þremur vikum fyrir fall bankans, um að aflétta persónulegum ábyrgðum af skuldum starfsmanna bankans vegna hlutabréfakaupa.

Heildarskuld Sigurðar vegna hlutabréfakaupa nam við fall bankans 5,5 milljörðum króna, en ákvæði í lánasamningum hans sagði til um að hann væri aðeins í ábyrgðum fyrir um 550 milljónum, eða sem nemur 10 prósent af heildarfjárhæðinni. Heildararðgreiðslur til Sigurðar á árunum 2005 til og með 2008 námu um 430 milljónum, og því gaf hlutabréfaeignin tímabundið vel af sér.

Guðni Ásþór Haraldsson, sem flutti málið í morgun fyrir hönd þrotabús Kaupþings, minntist á það í málflutningi sínum, að í árshlutauppgjöri Kaupþings á árinu 2008, sem endurskoðað var af endurskoðendum KPMG, væri sérstaklega á það minnst að veð fyrir lánum til stjórnenda bankans væru sambærileg og hjá öðrum viðskiptavinum Kaupþings, en því fór hins vegar víðsfjarri, eins og ákvæðið um takmarkaða ábyrgð á láni Sigurðar sýnir.

Sigurður mætti ekki sjálfur við aðalmeðferð málsins, en Gestur Jónsson lögmaður hans mótmælti kröfu þrotabúsins og vísaði greinargerð Sigurðar fyrir dómi. Málið bíður nú dóms í Héraðsdómi Reykjavíkur.