Forsætisráðherrann þakkaði fyrir hlýjar móttökur

Jóhanna Sigurðardóttir forsætisráðherra bauð Wen Jiabao, forsætisráðherra Kína, velkominn til landsins við upphaf fundar þeirra í Þjóðmenningarhúsinu í dag. Hún sagði ánægjulegt að forsætisráðherrann væri kominn til landsins og vonandi yrði heimsóknin til þess að styrkja tengsl ríkjanna.

Kínverski forsætisráðherrann sagðist glaður að vera kominn til Íslands og þakkaði fyrir hlýjar móttökur. Hann er fyrsti forsætisráðherra landsins sem kemur til Íslands. Hann sagðist vonast til þess að ferðin myndi styrkja tengsl og vináttu ríkjanna og það væri hægt að vinna áfram að þróun og samstarfi milli Íslands og Kína.