Erfðabreytt matvæli í Nóa Kroppi og Freyju Hrís

Nóa Kropp og Freyju Hrís innihalda erfðabreytt matvæli, og eru nú merkt þannig á umbúðum í samræmi við nýlega reglugerð. Freyja þarf að henda talsverðu magni af umbúðum, sem nú eru úreltar.

Engar breytingar hafa verið gerðar á Nóa Kroppi og Freyju Hrís. Þær eru nákvæmlega eins og þær hafa verið. En núna, samkvæmt nýlegri reglugerð, er búið að merkja þær þannig að þær innihalda erfðabreytt matvæli. Í þessum tilvikum er um að ræða erfðabreyttan maís.

Reglurnar tóku gildi um áramótin, og er óheimilt að selja slík matvæli án þess að þau séu þannig merkt.

„Við fórum bara í aðgerðir þegar við sáum þessa reglugerð koma. Þetta var ákvörðun hjá fyrirtækinu. Við ætlum ekki að vera með erfðabreytt matvæli í okkar vöruvali og skiptum þeim bara út þar sem þau voru ekki mörg," segir Kristján Geir Gunnarsson, framkvæmdastjóri markaðs- og sölusviðs Nóa Síríus.

„Það eina sem stendur út af er Nóa Kropp. Og þá er það bara merkt á umbúðunum eins og reglugerðin gerir ráð fyrir."

Kristján segir að Nói Síríus ætli ekki að breyta vörunni.

„Nei, þetta er vara sem neytandinn vill hafa óbreyttu formi. Þannig að við höfum ekki séð neitt hráefni sem getur komið í staðinn fyrir það sem er í vörunni og stenst okkar kröfur - ekki ennþá," segir Kristján.

Neytendasamtökin minntu nýverið á reglugerðina, þar sem borið hefur á að henni sé ekki fylgt.

Þegar fréttastofa fór í búðarferð fundust í einni hillunni pokar af Freyju Hrís, sumir merktir þannig að þeir innihalda erfðabreytt matvæli, en aðrir voru ekki merktir.

Forsvarsmenn Freyju gagnrýna í samtali við fréttastofu hversu skamman fyrirvara fyrirtæki fengu til að breyta merkingum á umbúðum. Þeir segja allt Hrís sem framleitt var eftir áramót merkt, en þeir sjái fram á að þurfa að henda miklu magni af umbúðum sem nú eru úreltar.

Sjá má myndrænni umfjöllun í meðfylgnandi myndskeiði.