Segir sjálfstæðismenn hafa samþykkt hugmyndirnar

Dagur B. Eggertsson, formaður borgarráðs Reykjavíkurborgar, segir að samkomulag sem til stendur að Reykjavíkurborg og ríkiið geri með sér um bættar almenningssamgöngur en frestun í mannvirkjagerð byggist á viljayfirlýsingu sem borgarfulltrúar Sjálfstæðisflokksins hafi staðið að og greitt atkvæði sitt á fundi borgarráðs í júlí í fyrra.

„Sú viljayfirlýsing sem vísað er til var samþykkt í öllum bæjarráðum á höfuðborgarsvæðinu sl. sumar. Í borgarráði var hún studd af fulltrúum allra flokka. Þar kemur skýrt fram að ætlunin með samningum væri að verulegt fjármagn eða um milljarður á ári kæmi til eflingar almenningssamganga gegn frestun stórframkvæmda á svæðinu. Þetta er ný hugsun sem byggir á raunsæju mati á svigrúmi til að ráðast í stórframkvæmdir á allra næstu árum, tekur mið af minnkun umferðar frá hruni og þeim vilja að aukning í umferð á næstu árum verði mætt með góðum almenningssamgöngum frekar en mislægum gatnamótum fyrir milljarða og milljarðatugi," segir Dagur í yfirlýsingu sem hann sendi frá sér í dag. Hann segir að framlög og framkvæmdir sem frestast komi hins vegar til endurskoðunar á tveggja ára fresti, út frá þeim árangri sem næst og þróun umferðar.