Þrír stöðvaðir með fölsuð vegabréf í vikunni

Þrír einstaklingar með fölsuð vegabréf voru stöðvaðir í Flugstöð Leifs Eiríkssonar á miðvikudaginn. Það sem af er ári hafa sex fölsunarmál komið upp í flugstöðinni.

Karl og kona voru kærð fyrir skalafals eftir að hafa framvísað fölsuðum vegabréfum við landamæraeftirlit í flugstöðinni. Parið var á leið til Kanada en þau sögðust bæði vera frá Íran. Við skoðun vegabréfanna kom í ljós að skipt hafði verið um mynd í þeim báðum.

Þá voru höfð afskipti af karlmanni í komusal flugstöðvarinnar en hann framvísaði vegabréfi annars manns. Maðurinn hafði verið að koma með flugi frá Noregi en kvaðst vera frá Eþíópíu. Í fórum hans fannst flugmiði með flugi til Kanada í dag. Maðurinn hefur verið kærður fyrir misnotkun skjals.

Málin eru nú til rannsóknar.

Það sem af er ári hafa sex fölsunarmál komið upp í Flugstöð Leifs Eiríkssonar. Í janúar var maður stöðvaður með senegalskt vegabréf annars manns. Tveimur dögum síðar var maður stöðvaður með belgískt kennivottorð annars manns. Þá var maður stöðvaður með grunnfalsað franskt kennivottorð í febrúar.

Á sama tíma í fyrra höfðu þrír einstaklingar með fölsuð skilríki verið stöðvaðir í flugstöðinni. Alls komu 33 fölsunarmál upp í flugstöðinni á síðasta ári.