Um 2,5% Íslendinga þjást af spilafíkn samkvæmt rannsóknarniðurstöðum dósents við sálfræðideild Háskóla Íslands. Niðurstöðurnar voru kynntar í dag. Þar kemur fram að 4.000 til 7.000 manns hér landinu á aldrinum 18 ára til sjötugs eigi í verulegum vanda.



Er þetta töluverð aukning frá sambærilegum könnunum árin 2005 og 2007.



Það var dr. Daníel Þór Ólason, dósent við sálfræðideild Háskóla Íslands, sem vann rannsóknina fyrir innanríkisráðuneytið. Hann kom einnig að fyrri rannsóknum. Skýrslan var kynnt á fundi í Reykjavík í dag.



„Niðurstöður sýna að um 76% fullorðinna Íslendinga spiluðu peningaspil a.m.k. einu sinni á síðustu 12 mánuðum fyrir könnun. Vinsælustu peningaspilin voru Lottó, flokkahappdrætti, skafmiðar, póker og spilakassar," segir í tilkynningu frá innanríkisráðuneytinu.



Þá voru karlar líklegri en konur til að spila peningaspil þar sem þekking á reglum og spilaumhverfi skiptir máli - er hér vísað í íþróttagetraunir og póker. Happdrætti eru vinsælli meðal kvenna.



Ögmundur Jónasson, innanríkisráðherra, ritar formála skýrslunnar. „Niðurstöður hennar eru um margt athyglisverðar," ritar Ögmundur. „Þar staðnæmist ég einkum við aukið umfang fjárhættuspils á Netinu og einnig við þann mikla fjölda fólks sem haldinn er spilafíkn. Sjálfur hef ég alltaf haft efasemdir um að kannanir af þessu tagi fái greint alla raunverulega spilafíkla, einfaldlega vegna þess að þeir bera böl sitt í hljóði. Tölurnar kunna því af þessum sökum að vera lægri eins og þær birtast okkur í könnunum en þær eru í sjálfum veruleikanum."



Á fundinum kynnti Kristófer Már Kristinsson forsendur hugsanlegra aðgerða sem hann hefur kannað fyrir innanríkisráðuneytisins. Hann sagði að forgangsverkefni sé að skipuleggja ólík meðferðarúrræði þannig að þau standi fíklum til boð og séu sýnileg, koma á virku eftirliti með peningaspilum og gagnaöflun og setja lög eða reglur sem tryggi ábyrga spilum á vegum þjóðþrifafyrirtækja.



Hægt er að nálgast skýrsluna í heild sinni hér fyrir neðan.