Ekki lengur hægt að senda nafnlaus smáskeyti

Gerðar hafa verið endurbætur á SMS-sendingum í gegnum vefsíðuna Já.is. Frá og með deginum í dag munu þeir sem senda SMS af Já.is þurfa að auðkenna sig áður en þeir geta sent SMS-skeyti í íslensk farsímanúmer. Þetta kemur fram í tilkynningu frá fyrirtækinu.

Þar segir að ókeypis SMS-sendingar í gegnum vefinn hafi staðið íslenskum netnotendum til boða í áraraðir. Brögð hafa verið að því í gegnum tíðina að þjónustan hafi verið notuð til að senda nafnlaus skilaboð í farsíma fólks.

Héðan í frá munu notendur þjónustunnar auðkenna sig með innskráningu og svokölluðu „SMS handartaki". SMS-skeytin sem send verða af Já.is verða auðkennd og þau munu birtast móttakandanum á sama hátt og ef væru send úr farsíma sendanda. Þessi breyting felur það jafnframt í sér að hægt verður að svara þeim sem sendi skeytið beint.

Önnur breyting er að SMS skeyti af Já.is verða héðan í frá gjaldfærð. Verð fyrir sendingu hvers skeytis verður á bilinu 6-8 kr sem er um 30% ódýrara en það kostar í gjaldskrá símafyrirtækjanna. Hingað til hafa SMS skeytin verið ókeypis en þeim hafa í staðinn fylgt auglýsingar. Póst- og fjarskiptastofnun vakti hins vegar athygli Já á því undir lok síðasta árs að auglýsingar mætti einungis senda með SMS-skeytum þegar móttakandi skeytisins hefði veitt samþykki sitt fyrir þeim fyrirfram.

„Við vildum finna leið til að þurfa ekki hætta að bjóða SMS-sendingar af Já.is þegar þessi ábending Póst- og fjarskiptastofnunar barst. Við ákváðum frekar að líta á þetta sem tækifæri og höfum því unnið að því að geta áfram veitt þessa þjónustu þó með breyttum og vonandi bættum hætti sé," segir Sigríður Margrét Oddsdóttir, forstjóri Já. „SMS-sendingar af netinu verða nú auðkenndar, þeim verður hægt að svara og farsímanotendur allra stærstu símafyrirtækjanna munu geta nýtt þessa þjónustu."