Ætla að setja heimsmet í tannburstun

Á morgun, þriðjudaginn 27. mars, klukkan 9.30 verður sett íslandsmet í tannburstun þegar Íþróttaálfurinn, nemendur í Snælandsskóla og starfsólk skólans taka sig til og bursta tennurnar í matsal skólans. Metið er hluti af átaki Barnaheilla - Save the Children á Íslandi um bætt tannheilbrigði hjá íslenskum börnum, en tannheilsa barna á Íslandi er í sjötta neðsta sæti í samanburði við OECD-löndin.

„Nemendur í Snælandsskóla hafa í samvinnu við samtökin gert könnun og unnið myndbönd um efnið sem sýnd verða á málþingi sem samtökin standa fyrir miðvikudaginn 28. mars á Grand hótel Reykjavík," segir í tilkynningu frá Barnaheillum. „Þá er hafin undirskriftasöfnun til að þrýsta á yfirvöld og aðra hlutaðeigandi að grípa til aðgerða hið snarasta. Undirskriftirnar verða afhentar velferðarráðherra á alþjóðlega tannverndardeginum, 12. september næstkomandi."

Þá segir að þeir sem hlut eigi að máli þurfi að „sameinast um að finna leið út úr því öngstræti sem tannheilsa íslenskra barna virðist komin í. Það er ekki ásættanlegt að í upphafi 21. aldarinnar séu börn að fá panódíl fyrir svefninn svo þau geti sofnað fyrir tannverkjum."

„Samkvæmt barnasáttmála Sameinuðu þjóðanna, sem Ísland hefur staðfest, eiga börn rétt á að njóta besta mögulegs heilsufars sem hægt er að tryggja, svo sem með læknisaðstoð og heilbrigðissþjónustu. Í 2. gr. sáttmálans er kveðið á um jafnræði og bann við mismunun, meðal annars á grundvelli félagslegrar stöðu. Þá er ábyrgð aðildarríkja þannig skilgreind að þeim beri að tryggja börnum þau réttindi sem barnasáttmálinn kveður á um eftir því sem þau framast geta auk þess sem ábyrgð foreldra er skýr."

Málþing Barnaheilla - Save the Children á Íslandi fer fram miðvikudaginn 28. mars næstkomandi þar sem fjallað verður um tannheilsu íslenskra barna - sjá nánar á vef samtakanna barnaheill.is.