ORF Líftækni eykur hlutafé um 300 milljónir króna

ORF Líftækni hefur nú lokið hlutafjáraukningu upp á 300 milljónir króna í samstarfi við Arctica Finance. Þetta kemur fram í fréttatilkynningu frá ORF Líftækni.

Fjórtán innlendir og erlendir fjárfestar tóku þátt í hlutafjáraukningunni og var umframáskrift 13,7%. „Fjármagnið hyggst ORF Líftækni nýta til áframhaldandi uppbyggingar á framleiðslu fyrirtækisins og til aukins markaðsstarfs erlendis. Hluthafar ORF Líftækni eftir hlutafjáraukninguna eru um 80 talsins," segir í fréttatilkynningu frá ORF.

Mikill árangur hefur náðst í markaðssetningu á framleiðsluafurðum ORF Líftækni bæði hér heima og erlendis, að því er segir í tilkynningu ORF. Sif Cosmetics, dótturfélag fyrirtækisins, sér um markaðssetningu á húðvörum með frumuvökum sem framleiddir eru af ORF Líftækni. EGF húðvörurnar eru mest seldu húðvörurnar á Íslandi í dag og BIOEFFECT® húðvörulína fyrirtækisins. „Þá er mikill áhugi hjá stórum líftæknifyrirtækjum á ISOkine™ vaxtarþáttum fyrirtækisins, sem notaðir eru við læknisfræðilegar rannsóknir, en ORF Líftækni býður upp á meira úrval af vaxtarþáttum sem framleiddir eru í plöntum en nokkurt annað fyrirtæki í heiminum," segir í tilkynningu ORF.

„Eftir tíu ára rannsókna- og þróunarstarf hefur sala á framleiðsluafurðum ORF Líftækni margfaldast á síðustu misserum og á síðasta ársfjórðungi 2011 var afkoma félagsins jákvæð. Á árinu 2011 námu tekjur ORF Líftækni ríflega 360 milljónum króna og höfðu þrefaldast frá árinu 2010. Gert er ráð fyrir því að tekjur fyrirtækisins muni enn tvöfaldast á þessu ári, með aukinni sölu og sókn á nýja útflutningsmarkaði.

ORF Líftækni er vaxandi nýsköpunarfyrirtæki á sviði líftækni sem er leiðandi í framleiðslu hágæða sérvirkra próteina fyrir læknisrannsóknir, húðvörur og líftækniiðnað. Með þróun og nýtingu á einstakri framleiðsluaðferð sinni, sameindaræktun í byggi, stefnir ORF Líftækni að enn frekari uppbyggingu sem hátæknifyrirtæki í fremstu röð á alþjóðlegum markaði. Hjá ORF Líftækni starfa nú um 40 manns," segir í tilkynningu frá ORF.