Íslensk olíuleitarfélög sækja um Drekann með erlendum félögum

Tveir aðskildir hópar Íslendinga undirbúa í samvinnu við erlend olíuleitarfélög að senda inn umsókn í Drekasvæðið, en frestur rennur út á mánudag. Báðir hóparnir leggja nú lokahönd á stofnun íslensks olíuleitarfélags, hvor í sínu lagi.

Fyrsta olíuleitarútboð Íslendinga fyrir þremur árum skilaði tveimur umsóknum, sem báðar voru svo dregnar til baka. Útboð númer tvö stendur nú yfir og rennur frestur til að leggja inn umsókn út klukkan sextán á mánudag.

Þótt jákvæðar upplýsingar hafi birst á undanförnum mánuðum um möguleika Drekasvæðisins, og meðal annars fengist staðfesting um tilvist olíu þar, ríkir mikil óvissa um hversu mikill áhugi verður á útboðinu nú, ekki síst vegna mikilla olíufunda í lögsögu Noregs að undanförnu, bæði í Barentsthafi og Norðursjó. Þannig hefur hið norska Statoil ekkert vilja gefa upp um hvort það hafi áhuga á Drekaútboðinu.

Stöð 2 hefur hins vegar traustar heimildir fyrir því að vænta megi tveggja íslenskra umsókna, sem eiga það sammerkt að báðar verða í samstarfi við erlent olíuleitarfélag. Hóparnir eru aðskildir og vita lítt hvor af öðrum, og hafa báðir farið leynt með áform sín. Hóparnir eiga það einnig sameiginlegt að í forystu þeirra eru Íslendingar með þekkingu á olíumálum sem fengið hafa fjársterka innlenda aðila í lið með sér, og áforma stofnun íslensks olíuleitarfélags.

Það að báðir hóparnir hyggist leggja inn umsókn í samstarfi við erlent olíuleitarfélag gefur jafnframt vonir um að útboðið nú skili meiri árangri en það fyrsta.