Rafrænar kosningar í Reykjavík hefjast eftir miðnætti

Rafrænar íbúakosningar í Reykjavík, þar sem kosið verður um verkefni í hverfum borgarinnar, hefjast þegar klukkan verður eina mínútu gengin í eitt í nótt, fimmtudaginn 29. mars. Þetta kemur fram í tilkynningu frá Reykjavíkurborg en opið verður fyrir móttöku atkvæða fram yfir miðnætti þriðjudaginn 3. apríl.

„Kjósendur fara inn á slóðina kjosa.betrireykjavik.is. Auðkenning Ísland.is er notuð við atkvæðagreiðsluna og nota kjósendur kennitölu og veflykil ríkisskattstjóra eða rafræn skilríki á debetkorti til að auðkenna sig," segir ennfremur. „Allir sem eiga lögheimili í Reykjavík og voru orðnir 16 ára um síðustu áramót geta greitt atkvæði í íbúakosningunum."

Ennfremur segir að verkefnið hafi verið kynnt undir kjörorðunum „KJÓSUM BETRI HVERFI."

„Áður hafa farið fram rafrænar kosningar á vegum Reykjavíkurborgar um verkefni í hverfum borgarinnar. Þær voru haldnar í desember 2009 undir kjörorðunum Kjóstu verkefni í þínu hverfi. Íbúakosningarnar núna eru eins konar framhald á því verkefni en þá var notast við kennitölur sem auðkenni. Núna eru hins vegar notuð rafræn auðkenni í fyrsta sinn sem eiga að tryggja enn meira öryggi við atkvæðagreiðsluna. Kjósendur eru vanir því að nota veflykil ríkisskattstjóra til að skila skattaframtali en skattgreiðendur hafa einmitt verið að nota veflykilinn til þeirra nota."

Þá kemur fram að á undanförnum vikum hafi verið gerð öryggisúttekt á kosningakerfinu af sjálfstæðum úttektaraðila.

180 verkefni

„Kosið verður um 180 áhugaverð verkefni í hverfum borgarinnar. Um er að ræða verkefni sem fegra og bæta hverfin. Kostnaður við verkefnin er mismunandi, sum kosta lítið en önnur meira, allt upp í tíu milljónir króna. Reykjavíkurborg leggur 300 milljónir úr svokölluðum hverfapottum í verkefnin og er þeim úthlutað til hverfanna miðað við íbúafjölda. Þau verkefni sem fá mest fylgi í íbúakosningunum munu koma til framkvæmda í sumar."